تعمیرِ انسانیت

اس جہانِ رنگ و بو میں کروڑوں نہیں اربوں انسان زندگی بسر کر رہے ہیں۔ مسلم بھی اور غیر مسلم بھی، نیک بھی اور بَد بھی، ظالم بھی آباد ہیں اور مظلوم بھی، جاہل افراد بھی موجود ہیں اور دانش مند بھی۔ مگر اس دَور میں نیکی کی بجائے بدی کا، عدل و انصاف کی بجائے ظلم و تشدّد کا اور امن و آشتی کی بجائے جہالت و بربریت کا غلبہ ہے۔ ہر طرف تاریکی چھائی ہوئی ہے۔ قتل و غارت گری کا بازار گرم ہے۔ بے حیائی اور فحاشی نقطۂ عروج تک پہنچی ہوئی ہے۔ اقدار مٹ رہی ہیں، عزتیں لٹ رہی ہیں اور عصمتیں داغدار ہو رہی ہیں۔
خصوصاً مسلمان قوم آج ذِلت و رسوائی کی اتھاہ گہرائیوں میں گرتی چلی جا رہی ہے۔ دیگر اقوام اسے تر نوالہ سمجھ کر ہڑپ کرنے کا عزم کیے ہوئے ہیں۔ انسانیت خوابیدہ ہے، اسے بیدار کرنے کی ضرورت ہے، دل مردہ ہو چکے ہیں، ان میں زندگی کی لہر دوڑانا ناگزیر ہے، دل بے شمار بیماریوں کا شکار ہیں، ان کا علاج از بس ضروری ہے۔
دل کو جسم انسانی میں ایک مرکزی حیثیت حاصل ہے جو کیفیت دل کی ہوتی ہے اعمال اسی کی ترجمانی کرتے ہیں۔ دل میں فساد و بربریت ہو تو اعمال سے یقیناً درندگی ٹپکے گی اور اس کے برعکس اگر دل میں امن و آشتی کے جذبات ہوں تو اعمال سے محبت و الفت کے زمزمے پھوٹیں گے۔ اسی لئے تو آنحضور ﷺ نے ارشاد فرمایا:
اَلَا فِي الْجَسَدِ مُضْغَةٌ اِذَا صَلُحَتْ صَلُحَ الْجَسَدُ كُلُّه وَاِذَا فَسَدَتْ فَسَدَ الْجَسَدُ كُلُّه اَلَا وَھِيَ الْقَلْبُ
کہ جسم انسانی میں ایک گوشت کا ٹکڑا ہے جب وہ درست ہوتا ہے تو جسم کے تمام اعضاء درست کام کرتے ہیں۔ جب اس میں خرابی پیدا ہوتی ہے تو تمام جسم میں بگاڑ پیدا ہو جاتا ہے۔
خبردار! وہ گوشت کا ٹکڑا انسانی دل ہے۔تعمیرِ انسانیت کے لئے سب سے پہلی اور بنیادی شرط یہ ہے کہ دل میں زندگی پیدا کی جائے۔ اب سوال یہ پیدا ہوتا ہے کہ زندہ دلی سے مراد کیا ہے؟ کیا اس دل کو زندہ نہیں کہا جائے گا جو معمول کے مطابق حرکت کرتا ہو اور جو دوسرے اعضاء کو باقاعدگی سے خون پہنچاتا ہو؟ زندہ دلی اسی کا نام ہے تو پھر اس کائنات میں کس کا دل مردہ ہے؟
اس سوال کا جواب علامہ حافظ ابن قیم رحمۃ اللہ علیہ کچھ یوں دیتے ہیں کہ جس سے یہ چیز کھل کر سامنے آجائے گی کہ زندہ دلی سے مراد کیا ہے؟
وہ تہذیب الایمان میں لکھتے ہیں کہ:
’’دل تین قسم کے ہیں۔ قلبِ سلیم (زندہ دل)، قلبِ میت (مردہ دل)، قلبِ مریض (بیمار دل)‘‘
قلبِ سلیم یعنی زندہ دل کی تعریف انہوں نے ان الفاظ میں کی ہے:
اَلَّذِيْ سَلِمَ مِنْ كُلِّ شَھْوَةٍ تُخَالِفُ اَمْرَ اللهِ وَنَھْيَه  یعنی زندہ دل وہ ہوتا ہے جو ہر اس خواہش سے پاک ہو جو اللہ تعالیٰ کے حکمِ امتناعی اور اثباتی کے مخالف ہو۔
مزید برآں لکھتے ہیں: فَسَلِمَ مِنْ عَبُوْدِيَّةِ مَا سِوَاهُ مُخْلِصٌ لِلهِ مَحَبَّتِه وَخَوْفِه وَرَجَائِه وَالتَّوَكُّلِ عَلَيْهِ وَالْاِنَابَةِ اِلَيْهِ وَاِيْثَارِ مَرْضَاتِه فِيْ كُلِّ حَالٍ وَالتَّبَاعُدِ مِنْ سَخَطِه اِنْ اَحَبَّ اَحَبَّ فِي اللهِ وَاِنْ اَبْغَضَ اَبْغَضَ فِي اللهِ وَاِنْ اَعْطٰي اَعْطٰي لِلهِ وَاِنْ مَّنَعَ مَّنَعَ لِلهِ  
یعنی زندہ دل وہ ہوتا ہے جو اللہ رب العزت کی بندگی کے سوا ہر کسی کی بندگی سے محفوظ ہو جس میں اللہ تعالیٰ سے محبت اور ڈر۔ اسی سے امید اور اسی پر بھروسہ پورے اخلاص کے ساتھ پایا جائے جو ہر حالت میں اسی کے حضور جھکے، اسی کی رضا کو ترجیح دے۔ جو اللہ تعالیٰ کی ناراضگی سے دور بھاگے۔ اگر کسی کو پسند کرے تو خدا کے لئے اور اگر ناپسند کرے تو بھی خدا کے لئے۔ اگر کسی کو دینے کا جذبہ پیدا ہو تو اپنے رب کو خوش کرنے کے لئے اور اگر کسی کو نہ دینے کا ارادہ ہو تو بھی اسی کی مرضی کے مطابق۔
علاوہ ازیں زندہ دل میں یہ اوصاف بھی پائے جاتے ہیں مثلاً حیا، پاکیزگی، صبر و تحمل، شجاعت، غیرت، خودی، نیکی سے محبت اور برائی سے نفرت۔
جس دل میں یہ خوبیاں پائی جائیں، اس میں ایک نور، ایک چمک پیدا ہو جاتی ہے۔ ایسا دل در حقیقت تجلیاتِ الٰہی کا مرکز ہوتا ہے۔ ایسے دِل پر انوارِ الٰہیہ کی بارش ہوتی ہے۔ اس حالت میں یہ محض ایک گوشت کا لوتھڑا نہیں ہوتا بلکہ نورانیت کا ٹھاٹھیں مارتا ہوا سمندر بن جاتا ہے۔ جس سے محبت و الفت، امن و آشتی، رحمت و رافت، صبر و تحمل اور ہمت و شجاعت کے بخارات اُٹھتے ہیں اور رفعت و سربلندی کے بادل بن کر ہر سو پھیل جاتے ہیں۔ جن سے
علم و حکمت اور عقل و دانش کی ایسی بارش ہوتی ہے کہ مردہ دلوں کے لئے حیاتِ نو کا پیام لاتی ہے اور پیاسے دلوں کو سیراب کرتی ہے۔ چنانچہ زندگی کا صحیح معنوں میں لطف اس شخص کو حاصل ہوتا ہے جو اپنے سینے میں ایسا دل رکھتا ہے جو مذکورہ بالا خوبیوں سے متصف و مشرف ہو۔ لہٰذا ہم میں سے ہر ایک کا یہ فرض ہے کہ وہ اپنے دل کا جائزہ لے اور یہ دیکھے کہ ان میں سے کون کون سی چیزوں میں موجود ہے اور کون کون سی چیز سے دل محروم ہے۔ جو چیز موجود ہے اس کو مستقل بنایا جائے اور جس چیز سے محرومی ہے، اس کو پیدا کیا جائے ورنہ انسانیت کی تعمیر ممکن نہیں۔
آج مسلم قوم کا یہ سب سے بڑا المیہ ہے کہ اس معیار کا صاحبِ دل عنقا ہے۔ ہر سو جہالت و مردہ دلی کی بے شمار مثالیں موجود ہیں جب تک یہ چیز ختم نہیں ہوتی اس قوم کو سرخروئی نصیب نہیں ہو سکتی۔ حافظ ابنِ قیمؒ نے تو مردہ دل انسانوں کو حقیقی مردوں کے ساتھ تشبیہ دی ہے۔
فرماتے ہیں:
وَھٰذَا مِنْ اَحْسَنِ التَّشْبِيْهِ لِاَنَّ اَبْدَانَهُمْ قُبُوْرُ قُلُوْبِھِمْ فَقَدْ مَاتَتْ قُلُوْبُھُمْ وَقَبْرَتْ فِيْ اَبْدَانِھِمْ  
کہ یہ ایک بہترین تشبیہ ہے اس لئے کہ ان کے بدن ان کے دلوں کی قبریں ہیں۔ دل مر گئے ہیں اور انہیں ان کے ابدان میں دفن کر دیا گیا ہے۔
یہاں پر مردہ دلی سے مراد یہ نہیں کہ ان دلوں کی حرکت یا دھڑکن بند ہو گئی ہے بلکہ اس سے مراد وہ دل ہیں جن میں مذکورہ چیزوں میں سے کوئی چیز نہ پائی جائے، جن پر جہالت و نحوست کی تہیں جمی ہوں اور جن میں زندگی پیدا کرنا صرف اسی طور ممکن ہے کہ مذکورہ اوصاف ان میں بتدریج پیدا کیے جائیں۔
آنحضرت ﷺ کا ارشاد گرامی ہے کہ:
’’جس طرح لوہا زنگ آلود ہو جاتا ہے بعینہٖ انسانی دل بھی زنگ آلود ہو جاتا ہے۔ آپ ﷺ سے دریافت کیا گیا، یا رسول اللہ ﷺ! دل کو صیقل کرنے یا اسے جلا بخشنے کا طریقہ کیا ہے؟ تو آپ ﷺ نے فرمایا، اللہ ربّ العزت کا تصور اور ہر آن اس کی یاد دلوں کو جلا بخشتی ہے اور ان میں نورانیت پیدا کرتی ہے۔‘‘
غرضیکہ جو اپنی خوابیدہ انسانیت کو بیدار کرنا چاہتا ہے، اس کے لئے یہ ضروری ہے کہ وہ اپنے دل کا جائزہ لے اور بتدریج اصلاح کی کوشش کرے ورنہ بصورتِ دیگر انسان اور حیوان میں کوئی بنیادی فرق نہ ہو گا اور ایسا انسان ’’ثُمَّ رَدَدْنٰهُ اَسْفَلَ سَافِلِيْنَ‘‘ اور ’’اُوْلٰٓئِكَ كَالْاَنْعَامِ بَلْ ھُمْ اَضَلُّ‘‘ کے زمرے میں آجائیگا۔
·        تو کیا ہماری تخلیق کا مقصد صرف یہ ہے کہ ہم کھائیں پئیں اور مر جائیں؟
·         کیا اس کائنات میں ہم پر کوئی ذمہ داری عائد نہیں ہوتی؟
·        کیا ہمیں کسی ضابطۂ اخلاق کی ضرورت نہیں؟
·        کیا ہم انسان ہیں؟ کیا ہم اشرف المخلوقات ہیں؟
·        کیا ہمیں ’’خلیفة الارض‘‘ بننے کا شرف حاصل ہے؟
·         اگر ہے تو کیوں؟
ذرا اپنے دلوں کا جائزہ لیں ۔ دماغوں سے سوچو اور میرے سوالات کا جواب دیجئے۔
Advertisements
6 comments
  1. ارے بی بی اتنا تو نہ ڈرایئے ۔ اللہ کے نیک بندے ابھی موجود ہیں اور دنیا کی بے ثباتی سے قطع نظر اپنے کام میں مشغول ہیں ۔
    یہ دل بڑی خطرناک چیز ہے ۔ ساری عمر میں اس کے ساتھ حالتِ جنگ میں رہا ہوں ۔
    اب میرے علم میں اضافہ کیجئے ۔ آشتی کا کیا مطلب ہے ؟ بہت دفعہ سنا ہے مگر مطلب معلوم نہیں
    آپ نے بربریت کا لفظ استعمال کیا ہے ۔ یہ فرنگی کی ایجاد ہے ۔ بربر ایک صلح جُو قوم تھی اور اب بھی ہے ۔ حبشہ کے بادشاہ کا واقعہ شاید آپ نے پڑھا ہو ۔ وہ بربر تھا ۔ بربریت کا لفظ اس قوم کو بدنام کرنے کی سازش تھی

    یہ تو بتایئے کہ طارق راحیل صاحب نے میرے دماغ میں کوئی ٹرانسمِٹر لگایا ہوا ہے جس کا ریسیور آپ کے پاس ہے کہ جو میں سوچتا ہوں وہ آپ کے پاس پہنچ جاتا ہے ؟ آج یہ تیسری بار ہوا ہے ۔ اب مجھے اپنی تحریر کی شکل بدلنا پڑے گی ۔ کتنا مشکل کام ہے پہلے سوچو پھر لکھو اور پھر اسے تبدیل کرنا پڑ جائے ۔ ایسا نہ کروں تو لوگ کہیں گے میں نقلچی ہوں

    • میں مایوس نہیں ہوں پر اکثر دنیا کی حقیقتوں کو نظر انداز کرتے ہوئے بھی اس افراتفریح میں مبتلا لوگوں کو دیکھ کر یہی اندازہ لگتا ہے کے بس اب آیا ہی چاہتی ہے قیامت اب کے تب

      اور آتشتی کے معنی پوچھ کر میرا مذاق تو نہیں اڑا رہے کہیں؟
      کہ آپ خود سمجھدار ہیں کم سے کم مجھ سے پھر بھی جب پوچھا ہے تو
      آشتی کے لغوی معنی کچھ یوں ہیں:
      مہربان٬ دوستانہ٬ پر امن، صلح۔
      اب مفہوم اس کا مضمون کے مطابق جیسا چاہیں بنا سکتے ہیں کہ عربی کی طرح بہت ہی زیادہ وسیع تو نہیں پر کسی سے کم بھی نہیں ہماری اردو زبان

      ظلم و بربریت اب محاورے میں شامل ہو چکا ہے تو اب اس کا ہم کیا کریں کوشش ہو گی کہ اب اس کا استعمال ترک کیا جائے اور اپنی اصلاح کی جائے

      میری تحریریں کئی ہفتوں ڈرافٹ مین رہنے کے بعد شامل ہونے کا شرف پاتی ہیں
      کسی کے دماغ میں کہیں میرے ڈرافٹ کا سانچہ فٹ تو نہیں مجھے ڈر لگنے لگا ہے

      • جی میری متعلقہ تحریر کی کئی مہینوں سے باری نہیں آ رہی کیونکہ زیادہ پھرتی لئے دوسری تحاریر اسے پیچھے دھکیل دیتی ہیں ۔ چند تحاریر سال بھر سے مسؤدے کے ڈبے میں بند پڑی ہیں
        آپ نے میری درخواست پر غور نہیں کیا

        • آپ چاہتے ہیں کہ میں کم شائع کروں تحریریں؟
          اور میں سمجھتی ہوں آنے والا وقت مجھے شائع ہی نہیں کرنے دے گا کچھ

  2. ایک میری مدد کیجئے ۔ میرا اُردو والا بلاگ کھول کر دیکھئے کہ پوسٹ اور تبصرے کے فونٹ پہلے سے کچھ بڑے ہیں یا نہیں ؟ یعنی کیا اب بہتر پڑھے جاتے ہیں ؟
    http://www.theajmals.com

  3. میں نے جو درخواست کی تھی ۔ اب اس کی ضرورت نہیں رہی ۔ اسلئے اس پر وقت ضائع کرنے کی ضرورت نہیں رہی

اپنی رائے دیجئے

Fill in your details below or click an icon to log in:

WordPress.com Logo

آپ اپنے WordPress.com اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Google+ photo

آپ اپنے Google+ اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Twitter picture

آپ اپنے Twitter اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Facebook photo

آپ اپنے Facebook اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

w

Connecting to %s

%d bloggers like this: