اورجب میں اللہ کے قریب ہوا۔۔۔۔

جب میں اللہ کے قریب ہوا۔۔۔۔

میں دکھ اور پریشانی سے بیگانہ ہو گیا

جب میں اللہ کے قریب ہوا۔۔۔۔

موت کا خوف مجھ سے دور ہو گیا

جب میں اللہ کے قریب ہوا۔۔۔۔

رزق کا خوف مجھ سے دور ہو گیا

جب میں اللہ کے قریب ہوا۔۔۔۔

مجھے دل کا اطمنان اور سکون ہو گیا

جب میں اللہ کے قریب ہوا۔۔۔۔

تمام شکوک و شبہات مجھ سے دور ہو گئے

جب میں اللہ کے قریب ہوا۔۔۔۔

دنیا کے تمام خداؤں اور آقاؤں سے دور ہو گیا

جب میں اللہ کے قریب ہوا۔۔۔۔

میں شرک جیسے بھیانک گناہ سے میں دور ہو گیا

جب میں اللہ کے قریب ہوا۔۔۔۔

میں گناہوں کے اندھیروں سے روشنی میں آگیا

جب میں اللہ کے قریب ہوا۔۔۔۔

میں نے ہر وقت کے گناہوں سے توبہ کر لی

جب میں اللہ کے قریب ہوا۔۔۔۔

میں حیوان نما انسان بننے سے بچ گیا

جب میں اللہ کے قریب ہوا۔۔۔۔

میں بہترین انسانی اخلاق کا مالک بن گیا

وَاعْلَمُواْ أَنَّ اللّه يَحُولُ بَيْنَ الْمَرْءِ وَقَلْبِه وَأَنَّه إِلَيْه تُحْشَرُونَ

ترجمہ اور جان لو کہ اللہ آدمی اور اس کے قلب کے درمیان (شانِ قربتِ خاصہ کے ساتھ) حائل ہوتا ہے اور یہ کہ تم سب (بالآخر) اسی کی طرف جمع کئے جاؤ گے(سورہ نمبر 08، سورہ الانفال،آیت نمبر 24)

امام ابن جریر رحمتہ اللہ علیہ اس آیت کا مفہوم بیان کرتے ہوئے فرماتے ہیں کہ اللہ اپنے بندوں کے دلوں پر پورا اختیار رکھتے ہیں ،جب چاہیں ان کے اور ان کے دلوں کے درمیان حائل ہو جاتے ہیں،حتٰی کہ انسان اللہ سبحان و تعالٰی کی مشیت کے بغیر کچھ بھی نہیں کر پاتا۔نبی پاک ﷺ کی حدیث ہے کہ”بنی آدم کے دل ،ایک دل کی طرح رحمٰن کی دو انگلیوں کے درمیان ہیں ،انہیں جس طرح چاہتا ہے پھیرتا رہتا ہے۔”پھر آپ نے یہ دعا فرمائی کہ”اے دلوں کو پھیرنے والے! ہمارے دلوں کو اپنی اطاعت کی طرف پھیر دے۔”(صحیح مسلم)

وَلَقَدْ خَلَقْنَا الْإِنسَانَ وَنَعْلَمُ مَا تُوَسْوِسُ بِهِ نَفْسُهُ وَنَحْنُ أَقْرَبُ إِلَيْهِ مِنْ حَبْلِ الْوَرِيدِ

ترجمہ اور بیشک ہم نے انسان کو پیدا کیا ہے اور ہم اُن وسوسوں کو (بھی) جانتے ہیں جو اس کا نفس (اس کے دل و دماغ میں) ڈالتا ہے۔ اور ہم اس کی شہ رگ سے بھی زیادہ اس کے قریب ہیں(سورہ نمبر 08، سورہ الانفال،آیت نمبر 24)

یعنی انسان کو کچھ چھپا تا اور دل میں مستور رکھتا ہے،وہ سب اللہ پاک جانتے ہیں۔وسوسہ دل میں گزرنے والے خیالات کو کہتے ہیں جس کا علم اس انسان کے سوا کسی کو نہیں ہوتا لیکن اللہ پاک ان وسوسوں کو بھی جانتے ہیں۔اس لئے حدیث پاک ﷺ میں آتا ہے کہ”اللہ نے میری امّت میں گذرنے والےخیالات کو معاف فرما دیا ہے،یعنی ان پر گرفت نہیں فرمائے گا۔جب تک وہ زبان سے اس کا اظہار نہ کرے یا عمل نہ کرے۔”(صحیح بخاری)

ورید شہہ رگ یا رگ جان کو کہتے ہیں جس کے کٹنے سے موت واقع ہو جاتی ہے۔یہ حلق کے 1کنارے سے کندھے تک ہوتی ہے۔اس قرب سے مراد قرب علمی ہے،یعنی علم کے لحاظ سےاللہ انسان کے بالکل اتنے قریب ہیں کہ اس کی نفس کی باتیں بھی جان لیتے ہیں۔امام ابن کثیر رحمتہ اللہ علیہ فرماتے ہیں کہ نحن سے مراد فرشتے ہیں ، کیونکہ ہمارے فرشتے انسان کی رگ جان سے بھی زیادہ قریب ہیں۔یہ فرشتے انسان کے دائیں بائیں ہر وقت موجود رہتے ہیں اور انسان کی ہر بات و عمل نوٹ کرتے رہتے ہیں۔

جب میں اللہ کے قریب ہوا۔۔۔۔

میں تمام مادی اور انسانی وسیلوں سے دور ہو گیا یعنی مجھے اللہ تک پہنچنے کے لئے کسی دنیاوی چیز اور انسانی مدد کی ضرورت نہیں پڑی اور یہ اللہ سبحان و تعالٰی کا انسانوں پر بہت بڑا احسان ہے کہ اللہ تک پہنچنے کے لئے تقویٰ اور پرہیز گاری کی ضروت ہےنہ کہ کسی انسانی و مادی وسیلہ وغیرہ کی ۔

خالق اپنی مخلوق کی طرف نظر کرم کرنے کے لئے ہر وقت تیار ہے۔