سحر انصاری

سحر انصاری، حیدرآباد دکن میں پیدا ہوئے۔دکن میں آپ نے یہی ایک قابل ذکر کام کیا دیگر اہم امور کراچی آکر سر انجام دیئے۔یاد رہے کہ اگر آپ دکن میں پیدا نہ ہوتے تو کراچی آکر بھی کچھ نہ کر سکتے ۔

کراچی میں آپ نے اردو،انگریزی اور لسانیات میں یکے بعد دیگرے 3ایم اے کئے۔اس سے پہلے کہ آپ مزید کوئی حرکت کرتے آپ کی شادی ہوگئی۔ اور پھر کافی بڑے عرصے تک کچھ نہ کیا،یعنی جامعہ کراچی میں کافی بڑے عرصے تک پڑھایا، ہاں البتہ یونیورسٹی کے بعد آپ رات گئے تک ادبی سرگرمیوں میں مشغول رہتے  ۔آپ نے جوانی کے سنہرے دن یونیورسٹی میں اور راتیں ادبی تقاریب میں ہی گذاردیں۔تقریباً تیس ،پینتیس برس سے ادبی تقاریب کے منتظمین  تقریب کے لئے جگہ کے انتخاب کے اور ریفریشمنٹ کے انتظام سے بھی پہلے آپ کو بک کرنا ضرور خیال کرتے ہیں۔