سرزمین سندھ

کہتے ہیں کہ1830؁ کے عشرے میں ایک بڑا سا گلیشئر ٹوٹ کر دریائے شیوک میں گر گیا تھا اور اس نے دریا کا راستہ روک دیا تھا چنانچہ اس کےپچھواڑے ایک بڑے جھیل بنتی چلی گئی اور بعد میں کچھ تو گلیشئر اور اس کا دل پگھلا،کچھ پانی کے ذخیرے نے دباؤ ڈالا اور پھر جو پانی کا ریلا آیا تو دریائے سند ھ ابل پڑا۔کہتے ہیں دریائے سند ھ کابل،جو اٹک کے مقام پر دریائے سندھ میں گرتا ہے،الٹا بہنے لگااور وادی پشاور میں دریا سے ایک عورت نکالی گئی جس نےبھیڑ کی کھال پہنی تھی اور کوئی اجنبی زبان بولتی تھی۔ہو سکتا ہے کہ وہ بلتی ہو اس صورت میں وہ دریا سندھ میں300میل بہی ہوگی۔مگر سچی بات یہ ہے کہ اس بات کو سچ نہیں سمجھنا چاہیئے۔

دریائے سندھ میں بدترین تباہی1841؁ میں آئی تھی۔کہتے ہیں کہ دریا کی وادی میں بہت ساری بستیاں آباد تھیں اور کوب کھیتی باڑی ہوتی تھی۔پھر 1840؁ کے جاڑوں میں ننگا پربت  کے دامن کا ایک پورا پہاڑ ٹوٹ کر دریا میں آگرا۔یہ وہ جگہ جہاں استور آکر سندھ میں گرتا ہے۔پہاڑ گر کر دریا میں بڑا سا ڈیم بن گیا اور 6ماہ بعد وادی میں 35میل لمبی ایک جھیل بن گئی جس کا دوسرا سرا گلگت شہر کو چھونے لگا۔

کچھ عرصہ بعد ڈیم ٹوٹا ۔لوگوں کو معلوم تھا کہ ایک نہ ایک دن یہ ہونا ہےچنانچہ وہ اپنے ڈرے اٹھا کر اونچےمقامات پر چلے گئے لہٰذا جانی نقصان تو کم ہوا لیکن زمین تباہ ہو گئی۔ اور گاؤں دیہات بہہ گئے۔سندھ کے زیریں علاقے میں لوگ اس سیلاب کے لئے تیار نہ تھے وہاں اب تک یہ داستان مشہور ہے کہ ایک مرتبہ پہاڑوں کی طرف سے بے حد اونچی لہر آئی تھی۔

1885؁ میں بھی دریائے گلگت یا شائد ہنزہ میں ایسا ہی ڈیم بن گیا تھا۔جب وہ ٹوٹا تو 300میل نیچے تک دریا صرف ایک دن میں 90فٹ اونچا ہوگیا تھا۔