حضرت عمار بن یاسررضی اللہ تعالٰی عنہ کی شیطان سے جنگ

حضرت عمار بن یاسررضی اللہ تعالٰی عنہ فرماتے ہیں میں نے نبی کریمﷺکے ساتھ مل کر جنات اور انسانوں سے جنگ کی ہے۔

پوچھا (جن سے)کس طرح جنگ کی؟

فرمایا کہ “ایک جنگ میں ہم نبی کریم ﷺکے ساتھ تھے،جب ہم ایک منزل پر اترے اور میں نے اپنا مشکیزہ اور ڈول پانی کے لئے اٹھایا تو آپﷺ نے فرمایا :

“تمہارے سامنے پانی کے سامنے کوئی(شخص)آئے گاوہ تمہیں پانی لینے سے منع کر دے گا،تم اس سے خبردار رہنا۔”

چنانچہ جب میں کنویں کی منڈیر پر پہنچا تو ایک کالا سیاہ انتہائی بدصورت شخص نظر آیا۔اس نے کہا اللہ کی قسم تم آج کنویں سے پانی کا ایک ڈول بھی نہیں لے سکتے۔ اس طرح ہماری جھڑپ شروع ہو گئی اور میں نے اس کو چت کر دیا۔اور ایک پتھر اٹھایا اور اس کی ناک اور منہ توڑ دیئے۔پھر اپنا مشکیزہ بھرا اور نبی کریمﷺ کی خدمت میں پہنچ گیا۔

آپ ﷺ نے پوچھا :کیا تمہیں روکنے تمہارے پاس کوئی آیا تھا؟

میں نے عرض کیا :جی ہاں ، اور سارا واقعہ گوش گزار کر دیا۔

آپ ﷺ نے فرمایا :جانتے ہو وہ کون تھا؟

میں نے لا علمی کا اظہار کیا۔

آپ نے فرمایا:وہ شیطان تھا۔

ایک روایت میں ہے کہ حضرت علی کرم اللہ وجہہ فرماتے ہیں :ہم عماررضی اللہ تعالٰی عنہ سے ملے اور ان کو کہا “اے عمار ، تم تو شیطان پر غالب آگئے”

حضور ﷺ نے (اس کے متعلق)ایسے ارشاد فرمایا ہے:

شیطان، عماررضی اللہ تعالٰی عنہ کے اور پانی کے درمیان کالے حبشی کی شکل میں رکاوٹ ڈال رہا تھا۔اور اللہ تعالٰی نے عمار کو غالب کر دیا”

حضرت عمار رضی اللہ تعالٰی عنہ فرماتے ہیں:

“اگر مجھے معلوم ہو جاتا کہ وہ شیطان ہے تو میں اس کو قتل کر دیتا، اگر اس سے سخت بدبو نہ آرہی ہوتی تو میں اس کی ناک ضرور کاٹ دیتا”

(علامہ جلال الدین سیوطی کی کتاب “تاریخ جنات و شیاطین)