گوریلا جنگ

مرہٹوں سے جنگ میں ایک مرتبہ حیدر علی نے ان کے لشکر پر شب خون مارا اور سامان رسد لے جانے والے کئی ہزار بیلوں پر قبضہ کر لیا۔کچھ بیل ادھر ادھر سے مل گئے۔ حیدر علی کے حکم پر سپاہیوں نے دس ہزار بیلوں کے سینگوں پر چیتھڑے باندھے اور انہیں مٹی کے تیل میں بگھو دیا اور جب آدھی رات ہوئی تو ان سینگوں پر لپٹے کپڑوں پر آگ لگا دی اور بیلوں کو مرہٹہ سردار “ترک راؤ ” کے لشکر کی جانب ہانک دیا ۔ مرہٹہ سپاہی آرام کی نیند سو رہے تھے۔بیل ان کے خیموں میں گھس گئے۔وہ بھگدڑ مچی کے خیمے جل اٹھے۔اور سواری کے گھوڑے رسی تڑا کر بھاگ گئے۔ اسی افراتفری مین حیدر علی نے حملہ کر دیا۔اور مرہٹوں کو عبرتناک شکست ہوئی۔ اس جنگ میں حیدر علی کے پاس چند ہزار سپاہی تھے جب کے مرہٹوں کا لشکر ایک لاکھ سے متجاوز تھا۔ حیدر علی نے اپنی چھوٹی سی فوج لے کر زندگی بھر بڑی ہی کامیابی سے دشمنوں کا مقابلہ کیا۔اس میں اس کی ذاتی ہمت و جرات کے ساتھ ساتھ اس کا طریق جنگ کا بھی دخل تھا، جسے “گوریلا جنگ “بھی کہا جاتا ہے۔چھاپا مار دستے دشمن کی اہم چوکیوں پر اچانک حملہ کر کےانہیں پریشان کرتےہیں۔گوریلا جنگ اس وقت لڑی جاتی ہے جب دشمن طاقت اور تعداد میں زیادہ ہواور اس کے وسائل بے اندازہ ہو۔