کتب بینی کے نقصانات

دور جدید میں جہاں شکر اور نمک جیسی اللہ کی عام نعمتیں مضر صحت ثابت ہو گئیں وہاں کتب بینی کے نقصانات بھی کھل کر سامنے آرہےہیں اور ہمارے ہم وطنوں نے اس فعل سے اجتناب  شروع کر دیا ہے۔

ماہرین کے مطابق کتب بینے کا ایک سب سے بڑا نقصان ہے کہ آپ کی بینائی متاثر ہوجاتی ہے۔ مثال کے طور پر ہم نے اپنے ملک کے بعض بڑے عالم فاضل حضرات کو دیکھا ہے جن کا بیشتر وقت کتب خانوں میں مطالعے میں گذرتا ہے ان کی بینائی اس حد تک متاثر ہو چکی ہے کہ ان کی نگاہوں اب اپنے علاوہ کوئی اور سماتا ہی نہیں۔

جسمانی نقطہ نظر سے ہٹ کر اس سے مال کا بھی ضیائع ہے۔ آج کل کوئی ڈھنگ کی کتاب 300یا 600 سے کم کی دستاب ہی نہیں۔وہ کتابیں بھی جنہیں لکھ کر مصنف سستی شہرت حاصل کر لیتے ہیں خاصی مہنگی ہیں۔ چاہے وہ غاصب جنرل وصدر ہو یا کوئی ایسا کرکٹر جو کبھی تیز رفتاری کے سوا سکنڈل ہی میں مشہور رہا ہو۔حال تو یہ کہ ایسی کتابیں جنہیں اہل غرض افسران اعلٰی کے نام سے چھپوا کر انکی رونمائی اور اپنی مشکل کشائی کرواتے ہیں وہ بھی سستی نہیں۔

کلاشنکوف کی آمد کے بعد ہماری درسگاہوں میں طالب علم زیور تعلیم کے بجائے زیور اسلحہ سے آراستہ ہوگئے ہیں۔اور اب وہاں کتابوں کو کوئی نہیں پوچھتا۔امتحان میں کامیابی کی ضمانت علمی صلاحیت نہیں اصل چیز کلاشنکوف کا استعمال کرنے کا ہنر ہے۔

کبھی بغل میں کتابیں طالبعلموں کی شناخت ہوا کرتی تھی اب اسلحہ ہی ان کا نصابی نشان ہے۔اب کسی طالب علم کے ہاتھ میں آپ کتاب دیکھیں تو یہ ایک خطرناک امر ہے ہو سکتا ہے یہ کسی پاکستان دشمن بیرونی طاقت کا ایجنٹ ہو جو ہمارے طلبہ میں منافرت پھیلا نا چاہتا ہو۔

ایک روز ہمارے ساتھ بس میں 2طالبعلم سوار ہوئے ان میں سے ایک کے ہاتھ میں موٹی سی کتاب کو دیکھ کر مسافروں کو بجا طورپر تشویش ہوئی اس کا ساتھی اس کو “کتابی کیڑے ،کتابی کیڑے “کے طعنے دینے لگا تو اس غیور نوجوان سے برداشت نہ ہو سکا اس نے اپنی صفائی پیش کرنے کی غرض سے وہ کتاب کھول دی ۔تب یہ دیکھنے میں آیا کہ وہ کتاب نہیں چاکلیٹوں کا کتاب نما ڈبہ تھا۔

علم کی ناقدری اور دنگا فساد کے اس زمانے میں پھر بھی موٹی کتابوں کو کسی حد تک قدر کی نگاہ سے دیکھا جاتا ہے۔کیونکہ بعض اوقات ایسی کتابوں سےحملے سے دورا ن ڈھال کا کام لیا جا سکتا ہے۔اور دوران پاتھا پائی بطور ہتھیار کا کام بھی لیا جاسکتا ہے۔اگر آپ کے پاس شہاب نامہ یا اس قسم کی کوئی دوسری کتاب ہو تو اس کے ذریعے یہ دوکام بطریق احسن انجام پا سکتے ہیں۔

علم کے متعلق بزرگوں سے سننتے آئے ہیں یہ وہ خزانہ ہےجو کبھی چوری نہیں ہوتا مگر آج کے اس ترقی یافتہ دور میں کوئی خزانہ ایسا نہیں جو چوری سے محفوظ ہو۔ہم دور کیوں جائیں اپنے ہی وطن میں اکثر “علم “معہ”عالم”اغوا کر لیا جاتا ہے۔

کسی دانا نے کتابوںکی3اقسام بیان کی تھیں :

1وہ جنہیں صرف سونگھا جاتا ہے2وہ جنہیں چکھا جاتا ہے اور3وہ جنہیں چبایا جاتا ہے۔

مگر ہمارے ملک میں صرف کتابوں کی ایک ہی قسم پائی جاتی ہے وہ کتابیں جنہیں صرف سجایا جاتا ہے۔اور بد قسمتی سے اللہ کی کتاب بھی اسی زمرے میں شامل ہے۔لیکن اب کچھ تلخ تجربات کے بعد لوگوں نے کتابوں کو بھی اپنے ڈرائنگ روم میں سجانا بند کر دیا ہے۔اس فیشن میں یہ قباحت محسوس کی گئی کہ بعض اوقات مہمان کی نظر کسی مانوس کتاب پر پڑھ جائے اور وہ اس پر تبصرہ کرنے لگےتو میزبان کو ناگوار صورت حال سے دوچار ہونا پڑ جاتا ہے۔

کتابوں کا عشق بھی عشق مجازی سے کم نہیں۔انسان اپنی دولت تک کتابوں کی نظر کر دیتا ہے۔اور پس مرگ اس کی اولاد تمام عمر مرحوم کو کوستی ہے اور دیمک ان کتابوں کو چاٹتی ہے۔ہم خود ذاتی طور پر کتب بینی کے ستائے ہوئے ہیں۔اور ہماری زندگی اجیرن ہے۔

مصیبت یہ ہے کہ ہمارے شوہر نامدار کو کتب بینی کا نشہ ہے بغیر کتاب کا مطالعہ نیند ہی نہیں آتی۔زرا سی نیند توٹی نہیں اور تکئے کےنیچے سے کتاب برآمد ہمیں اعتراض نہیں مگرکیا کریں کہ روشنی میں ہمیں نیند آتی نہیں اور جب تک لیمپ جلتا رہتا ہے ۔ہمارا دل بھی جلتا رہتا ہے۔ وہ تو بھلا ہو کے ای ایس سی والوں کا کہ جن کی مہربانی سے ہماری اس مصیبت سے اکثر جان چھوٹ جاتی ہے۔

دور حاضر میں یہ بے ضرر شوق ضرور دیکھنے میں آرہا ہے کہ اکثر لوگ کتب بینی کے نعم البدل کے طور پر کتابی چہروں کا بغور مطالعہ کرتے رہتے ہیں۔

زمانۂ قدیم میں جب پڑھنے پڑھانے کا بڑا چرچا تھا تو بچوں کو ایسی ویسی کتابوں سے دور رکھا جاتا تھا کہ مباداً ان کا اخلاق بگڑ جائے۔البتہ گھر کے بڑے بوڑھے اخباری کاٖغذ چڑھا کر ان کا چھپ کر مطالعہ کیا کرتے۔ لیکن اب وقت ایسا آگیا ہے کہ کیبل اور انٹرنیٹ کی بدولت معصو م اولاد کی “جنرل نالج “ان کتابوں کی معلومات سے کہیں زیادہ وسیع ہے۔

آپ غور کیجئے کتب بینی بہت سے جرائم کی جڑ ہے یہ انسان کو سوچنے پر مجبور کرتی ہے اور بعض اوقات تو باغیانہ افکار انسان کی ذہن میں جنم لینے لگتے ہیں۔اس کے اندر تحریر و تقریر کی آزادی کا شعور پیدا ہوتا ہے۔چونکہ ہم نے بیشتر حصہ آمریت کے زیر سایہ گزارا ہے لہٰذا ایسے حالات میں ضرور ی ہے کی ہمارے ملک میں کتابوں کے مطالعے پر قانوناًٍ  پابندی عائد کر دی جائے۔