حضرو

دریائے سندھ یوں تو خاموشی سے بہا جا رہا ہے لیکن اگر اس کے منہ میں زبان ہوتی تو یہ رات دن تاریخ کی داستانیں سنایا کرتا۔ یہ بتایا کرتا کہ کیسی کیسی افواج اس کے کنارے آپس میں ٹکرائیں اور کب کب اس کا پانی سرخ ہوا۔

دریائے  سندھ کے دو کناروں پر دو مقامات  بہت اہم ہیں۔ پشاور کی جانب ہنڈ اور راولپنڈی کی طرف حضرو۔

شمال سے جو لشکر ہندوستان آیا کرتے تھے ان کے گھوڑے اسی ہنڈ کے مقام پر دریا میں اترتے تھے اور احتیاط سے قدم اٹھاتے ہوئے اس حضرو کے قریب دوسرے کناروں پر چڑھتے تھے یہی کنارہ چھچھ کہلاتا ہے۔

کہتے ہیں 24 میل چوڑا اور 12 میل لمبا یہ علاقہ پیالے کی شکل کا اور پان کے پتے سے مشابہ ہے۔ اس کے 3 کنارے اونچے اور چوتھا کنارہ نیچا ہے بالکل  جیسے اپنی طرف دانے پھٹکنے کا چھاج ہوتا  ہے۔ پرانی روایاتوں کے مطابق اس علاقے کا پرانا نام چھج تھا۔

حضرت عیسٰی     سے 327 سال پہلے سکندر اعظم اسی چھچھ کے گاؤں ملاح میں داخل ہوا تھا۔ 1000؁ کے ذرا بعد راجا آنند پال اور محمود غزنوی کی لڑائی یہیں حضرو کے مقام پر ہوئی اور سید احمد شہید  نے یہیں سکھوں سے ٹکر لی اور مولانا ظفر علی خان کو یہیں حضرو میں مجرم قرار دیتے ہوئے سزائے قید کا حکم سنایا گیا تھا۔

http://upload.wikimedia.org/wikipedia/commons/6/66/Pakistan_location_map.svg