ہائے رے کھٹمل

پہلے تو مجھے یہ سمجھ ہی نہیں آرہا تھا کہ اس موضوع شروع بھی کروں کچھ لکھوں بھی کہ نہیں
پھر سوچا لکھنے کے ساتھ گوگل پر بھی کچھ تلاش کرتی ہوں

وجہ کچھ یہ ہے کہ میں کھٹملوں سے تنگ سخت آگئی ہوں گزشتہ 3 سال میں کئی دفعہ کئی فیومیگیشن والوں کا بھلا کرواچکی ہوں مگر اب تک کھٹملوں سے نجات نہیں ملی ،فی الحال گھر تبدیل نہیں کیا جاسکتالیکن میں نے آخری دفعہ اسپرے کرواکر سارا فرنیچر بیچ ڈالا تھا اور نیا فرنیچر بھی لے لیا تھا
مگراب
دوبارہ سے کھٹمل نمودار ہوگئے ہیں۔

گھریلوٹوٹکے اور فیومیگیشن کو آزماچکی ہوں۔مجھے اس بارے میں پوچھتے ہوئے جھجک بھی محسوس ہورہی ہے کیونکہ لوگ گھروں میں کھٹمل پڑنے کو اچھا نہیں سمجھتے۔دراصل ہماری کچھ ماسیوں کے گھر کھٹمل ہیں اور ان ہی کے ساتھ ہجرت فرماکرہمارے غریب خانے پر براجمان ہوگئے ہیں۔
اگر آپ کو اس سے نجات کے بارے میں کچھ علم ہوتو ضرور بتائیں

خدارا جنگ یا کسی اور روزنامے والی فیومیگیشن سروس کے بارے میں نہیں بتائیے گا کیونکہ اس بارے میں میرا تلخ تجربہ ہے۔
ویسے میں اس کو اللہ تعالیٰ کی جانب سے ایک امتحان بھی سمجھتی ہوں۔

اللہ آسانی فرمائے گا۔

اب مزید پریشانی یوں ہوئی کہ انٹرنیٹ پر مختلف ممالک کے چند تلخ تجربے اور ان کے حقائق سامنے آئے ہین کہ یہ کبھی ختم نہیں ہوئے پوری طرح سے جانے کیا کرنا ہوگا ان کا۔

اب کچھ ان خون چوسنے والے حشرات کے بارے مین بھی جان لیجئے

اپنی رائے اور تجربے ضرور شیئر کیجئے گا

شکریہ

ْْْْْْْْْْْْْْْْْْْْْْْْْْ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کھٹمل سے انسان کا بڑا ہی پرانا رشتہ ہے۔ شہر ہو یادیہات وہ ہر جگہ اس کے ساتھ ساتھ رہتا ہے۔ کھٹمل خون چوسنے کے لیے بہت مشہور ہے وجہ اس کی یہ ہے کہ اس کے منہ میں بہت ہی تیز باریک سوئیاں ہوتی ہیں جو کھال کو چھید کر گھس جانے اور پھر خون چوسنے کا کام کرتی ہیں۔ کبھی کبھی تو یہ سرخ رنگ کا ننھا سا کیڑا طاقت ور اور بہادر انسان کا خون چوس کر اس کی نیند حرام کر کے اپنی برتری کا ببانگ دہل اعلان کرتا ہے۔

کھٹمل جس کا سائز عام طور پر چاول کے ایک دانے کے برابر ہوتا ہے، کافی سخت جان طفیلی جاندار ہے۔  اس کی اوسط عمر 10 ماہ کے قریب ہوتی ہے۔ کھٹمل ویسے تو جانداروں کے خون سے اپنی بھوک مٹاتا ہے تاہم اس کے سخت جان ہونے کا اندازہ اس بات سے لگایا جا سکتا ہے کہ یہ کیڑا کسی کا خون چوسے بغیر بھی ہفتوں زندہ رہ سکتا ہے۔ دوسری طرف اس کی مادہ افزائش نسل کے حوالے سے کافی فعال واقع ہوئی ہے اور اپنی زندگی میں ساڑھے تین سو تک انڈے دیتی ہے۔ اسی لئے یہ پیراسائٹ جہاں کہیں بھی ہو، اس کی آبادی میں اضافہ بڑی تیز رفتاری سے ہوتا ہے۔

 کھاٹ، کھٹولی ہو یا پلنگ، چارپائی، ٹرین کے ڈبے ہوں یا سینما گھر کی کرسیاں ہر شگاف میں کھٹمل اپنا مسکن بنانے میں کامیاب ہوجاتا ہے۔ کھٹمل کو عرف عام میں کھٹ کیڑا بھی کہتے ہیں۔ آئیے آج اس کھٹ کیڑے کے بارے میں کچھ جانکاری حاصل کریں:

ا۔ کھٹمل یا اڑس ہندی لفظ ہے جس کو عربی میں کتان ، فارسی میں شب گز، بنگلہ میں چھار پورکا اور انگریزی میں  Bedbugکہتے ہیں۔

٢۔ یہ کیڑے کی جس جماعت سے تعلق رکھتا ہے اس کا نام ہیمی پیٹرا Hemepetra ہے ویسے اس کا سائنسی نام  Cimex Lectulariusہے۔

٣۔ یہ کم وبیش ساری دنیا میں پایا جاتا ہے۔ لیکن اسے گر م اور مرطوب جگہ زیادہ پسند ہے۔

٤۔ گھروں میں عام طور پر دو قسم کے کھٹمل پائے جاتے ہیں ایک کا سائنسی نام Cimex Lectularius تو ہے ہی دوسرے کا سائنسی نام Cimex Rotundatusہے۔ پہلا برصغیر کی تمام جگہوں کے علاوہ بعض بیرونی ممالک میں پایا جاتا ہے۔ جبکہ دوسرا شمالی ہندستان اور یورپ کے کچھ علاقوں میں زیادہ نظر آتا ہے۔ دونوں کی عادات و اطوار اور دورِ حیات کم و بیش ایک ہی جیسا ہے۔

٥۔ کھٹمل بے پر کا Wingless کیڑا ہے۔ جسم اس کا چوڑا، چپٹا اور بیضوی  Ovalشکل کا ہوتا ہے۔

٦۔ سر اس کا دبکا ہوا  Squatلیکن مونچھیں  antennaeبڑی ہوتی ہیں۔

٧۔ کھٹمل کے جسم کی لمبائی 6 ملی میٹر 0.25انچ تک ہوتی ہے۔

٨۔ کھٹمل رات کا کیڑا  Nocturnal Insectہے۔ یہ رات میں بڑا چاق و چوبند رہتا ہے۔ دن کو اندھیرے کی جگہ آرام کرنا پسند کرتا ہے لیکن سخت بھوک کی حالت میں شکار ملنے پر دن میں بھی نکل کر اپنا پیٹ بھرتا ہے۔

٩۔ کھٹمل کا اصلی رنگ ہلکا بھورا ہوتا ہے۔ مگر سیر شکم ہونے پر اس کا رنگ زنگ کی طرح سرخ Rust Red ہوجاتا ہے۔

١٠۔ کھٹمل کی مادہ سیر شکم ہونے کے بعد دن میں دراڑوں یعنی شگافوں میں کھردری جگہ انڈے دیتی ہے۔ یہ ساری زندگی میں لگ بھگ دو سو انڈے دیتی ہے۔ انڈے دینے کے زمانے میں بارہ انڈے روزانہ کے حساب سے انڈے دیتی ہے۔

١١۔ انڈوں سے بچے چھ سے سترہ دنوں کے اندر نکلتے ہیں جو نمفس Nymphs کہلاتے ہیں۔

١٢۔ پیدائش کے وقت نمفس ہلکے پیلے رنگ کے ہوتے ہیں۔ غذا سے پیٹ بھرنے کے بعد ان کا رنگ گہرا ہوجاتا ہے۔

١٣۔ بچے تقریباً دس ہفتوں میں بالغ ہوجاتے ہیں۔

١٤۔ بچے پیدائش کے فوراً بعد ہی خون چوسنے کے قابل ہوجاتے ہیں حتیٰ کہ وہ اپنے ساتھیوں کا بھی خون چوسنے لگتے ہیں جن کے پیٹ خون سے بھرے ہوتے ہیں۔

١٥۔ خون چوسنے کے بعد کھٹمل کا جسم پھول جاتا ہے۔

١٦۔ کھٹمل انسانوں کا خون تو چوستا ہی ہے اس کے سوا بعض پستانیے اور گرم خون والے جانوروں کا بھی خون چوستا ہے۔

١٧۔ یہ انسانوں کے بدن کی گرمی اور اس کی خارج کی ہوئی کاربن ڈائی آکسائیڈ گیس کی بو کو آسانی سے محسوس کرلیتا ہے اور جیسے ہی محسوس ہوتا ہے فوراً کاٹنے کے لیے دوڑ پڑتا ہے چاہے دن ہی کیوں نہ ہو۔

١٨۔ کھٹمل خون چوسنے کے لیے اپنی سونڈ Proboscisکو جلد پر اوپر نیچے کر کے چبھوتا ہے اس کے بعد اپنے منہ سے لعاب داخل کرتا ہے۔ یہ لعاب خون کو جمنے نہیں دیتا اس کے بعد لعاب سے ملا ہوا خون چوسنے لگتا ہے۔

١٩۔ کھٹمل کو سیر شکم ہونے میں پانچ سے دس منٹ لگتے ہیں۔

٢٠۔ کھٹمل عام طور پر ٢ یا ٣ مرتبہ لگا تار کاٹتا ہے۔

٢١۔ جب کھٹمل حلق تک خون چوس لیتا ہے تو پھر کسی پوشیدہ جگہ چھپ کر اطمینان کے ساتھ تھوڑی دیر کے لیے بیٹھ جاتا ہے اور غذا کو آہستہ آہستہ ہضم کرتا ہے۔

٢٢۔ کھٹمل اگر کسی وجہ سے چارپائی یا بستر پر پہنچ نہیں پاتا تو دیوار پر چڑھ کر چھت سے سونے والے کے جسم پر گر کر خون چوسنے لگتا ہے۔

٢٣۔ کھٹمل کو غذا نہ ملنے پر اس کی نشوو نما میں کمی میں آجاتی ہے لیکن جیسے ہی غذا فراہم ہوجاتی ہے پھر اس کی نشو ونما میں تیزی آجاتی ہے۔

٢٤۔ کھٹمل کے صرف کاٹنے پر نہ احساس ہوتا ہے اور نہ ہی درد ہوتا ہے۔ درد اس وقت ہوتا ہے جب یہ اپنا لعاب جلد میں داخل کر دیتا ہے بلکہ اسی لعاب کے کیمیائی عمل کی وجہ سے سوزش بھی پیدا ہوجاتی ہے۔

٢٥۔ کھٹمل جب اپنا لعاب جلد میں داخل کردیتا ہے تو کھجلی پیدا ہوتی ہے اور متاثرہ حصہ سرخ ہوکر ابھر جاتا ہے۔

٢٦۔ کھٹمل کے چھ پیر ہوتے ہیں اور یہ رینگ کر چلتا ہے۔

٢٧۔ کھٹمل ٹھیک صبح صادق کے قبل زیادہ کاٹتا ہے۔

٢٨۔ کھٹمل کی کثیر تعداد ایک جگہ جمع ہوتو ایک طرح کی ناگوار بو خارج ہوتی ہے۔

٢٩۔ کھٹمل کے دشمن انسان کے سوا شاذ و نادر ہی کوئی دوسرے جانور ہوں حتیٰ کہ چھپکلی بھی اسے منہ نہیں لگاتی ہے۔

٣٠۔ کھٹمل کے انڈے سے بچے نکلتے ہیں تو ان کے بالغ ہونے تک وقفے وقفے سے پانچ مرتبہ ان کی کھال گرتی ہے اور نئی کھال نکلتی ہے۔ اسی کو سائنس کی زبان میں پر جھاڑنا Moultingکہتے ہیں۔

٣١۔ کھٹمل کا شمار بیماری پھیلانے والے کیڑوں میں نہیں ہوتا۔ حقیقت صرف اتنی ہے کہ اس کے کاٹنے سے کھجلی ہوجاتی ہے

کھٹمل سے بچاؤ کی تدابیر:

ا۔ سب سے پہلے بستروں پر اسے چڑھنے سے روکا جائے۔ اس کے لیے پلنگ یا چارپائی کے پایوں کے نیچے سے کم از کم دو انچ اونچائی تک معدنی تیل یا Vaseline لگادی جائے

٢۔ ضرورت پڑنے پر کیڑے مار دوائیاں مثلاً  Gentrolجنٹرول یا Phantomفانٹم استعمال کی جائیں۔ احتیاط یہ برتی جائے کہ ان دوائیوں سے لحاف، گدے اور چادر وغیرہ محفوظ رہیں۔

٣۔ گاہے گاہے پلنگ، چارپائی اور چوکی پر گرم پانی بہایا جائے۔

نوٹ: بے کار رہی ہیں میرے لئے تو۔۔۔۔۔

کھٹمل کے کاٹنے پر :

١۔ کاٹنے کی جگہ کو عفونت رفع صابن  Antiseptic Soapسے صاف کرنا چاہيے۔

٢۔ پھولے ہوئے مقام پر لگاتار برف کے ٹکڑوں سے رگڑنا چاہيے۔

٣۔ شدید کھجلی ہونے پر Calamine Lotion یا کوئی دوسری کریم لگانا چاہیے۔ شدید تکلیف ہو تو دافع درد دوائی کا استعمال کرنا چاہيے لیکن ڈاکٹر کے صلاح مشورے کے بعد۔

٤۔ وہ پودے جن سے کھٹمل بھگائے جاتے ہیں انہیں Bug Waneیا Bug Wortکہتے ہیں۔

نوٹ:مجھے کبھی ایسی کوئی شکایت نہیں ہوئی ہے